Alexios IV. (Byzanz)

Us der alemannische Wikipedia, der freie Dialäkt-Enzyklopedy
Hops zue: Navigation, Suech
Alexios IV. Angelos
Kaiser vom Byzantinische Riich
Dr Alexios IV. Angelos
Regierigsziit 1203–1204
Name Alexius IV. Angelus
Uf d Wält cho öbbe 1182
Gstorbe 8. Februar 1204
Vorgänger Alexios III. Angelos
Nochfolger Nikolaos Kanabos
Dynastii Angelos
Vater Isaak II.
Mueter Irene

Dr Alexios IV. Angelos (griechisch Ἀλέξιος Δ' Ἄγγελος, * 1182; † 28. Januar 1204) isch vom 1. August 1203 bis zum 25. Januar 1204, won er für abgsetzt erkläärt worden isch, dr Kaiser vo Byzanz gsi.

Lääbe[ändere | Quälltäxt bearbeite]

Dr Alexios Angelos isch dr Soon vom Isaak II. gsi. Wo si Unggle e Staatsstreich gegen e Isaak gmacht het und as Alexios III. het afo regiere, het er dr jungi Alexios zämme mit sim Vater gfange gnoo.

Er het 1201 chönne flüchte und isch zu sim Schwooger Philipp vo Schwoobe, wo mit sinere Schwöster Irene verhürootet gsi isch, gange. Dört het er däm si Gusäng, dr Bonifatius vo Montferrat aadroffe, wo dr Füerer vom Vierte Chrüzzuug gsi isch. Dr Bonifatius und dr Alexios häi abgmacht, ass dr Chrüzzuug zerst uf Konstantinopel wurd go und dr Alexios III. wurd verdriibe. Drfüür het dr Alexios versproche, ass er d Armee vo de Chrüzfaarer mit byzantinische Soldaate wurd versterke und Venedig 200'000 Silbermark wurd gee für iiri Usgoobe.

Wo dr Alexios im Joor 1203 zämme mit de Chrüzfaarer uf Konstantinopel cho si, het dr Kaiser Alexios III. nid welle abdangge, sondern isch uf Thrakie gflüchdet. D Byzantiner häi denn aber wider dr Isaak iigsetzt, wo aber noch siner lange Gfangeschaft in schlächtem Zuestand gsi isch. Er het si Soon as Alexios IV. zum Mitkaiser ernennt.

Dr Alexios het jetz müesse d Verspräche iilööse, won er de Chrüzfaarer gmacht het, het aber bald uusegfunde, ass Byzanz weder gnueg Soldaate no gnueg Gäld het. Dorum si d Chrüzfaarer z Konstantinopel bliibe. Dört si si bi dr Bevölkerig immer verhasster worde. Am 25. Januar 1204 het denn dr Aafüerer vo dr byzantinische Bardei, dr Alexios Murtzuphlos, die bäide Kaiser abgsetzt. Dr Alexios isch am 28. Januar ermordet worde, si Vater Isaak isch under unkläärte Umständ gstorbe. Am gliiche Daag isch dr Nikolaos Kanabos zum nöije Kaiser gweelt worde, aber nume e baar Dääg spööter het dr Alexios Murtzphlos as Alexios V. sälber de Droon bestiige.

Litratuur[ändere | Quälltäxt bearbeite]

  • Ljubomir Maksimović: "Alexios IV. Angelos." In: Lexikon des Mittelalters (LexMA). Band 1, Artemis & Winkler, Münche/Züri 1980, ISBN 3-7608-8901-8, Sp. 386–387.
Dä Artikel basiert uff ere fräie Übersetzig vum Artikel „Alexios_IV._(Byzanz)“ vu de dütsche Wikipedia.

E Liste vu de Autore un Versione isch do z finde.