Adolf Bolliger (Naturschützer)

Us der alemannische Wikipedia, der freie Dialäkt-Enzyklopedy
Dä Artikel prichted über de Naturschützer und Storchevater Adolf Bolliger vo Ötwiil am See. De Pfarrer Adolf Bolliger z Basel, z Bärn und z Neumünschter isch en andere gsi.
Dialäkt: Züritüütsch

De Adolf Bolliger isch en Naturfründ und Naturschützer z Ötwiil am See im Zürcher Oberland gsi. Er isch am 6. Augschte 1910 uf d Wält cho[1] und vor em 3. April 2002 gstorbe. Er häd z Ötwiil i de Psychiatrische Klinik «Schlössli» als Pfleger gschaffed.[2]

Bolliger Weier[ändere | Quälltäxt bearbeite]

I sinere Freiziit häd er am Waldrand oberhalb vom Langholz es Naturparadiis gschaffe, won hüt es Naturschutzgebiet isch. Zäme mit Fründe hät er en groosse Weier usgrabe und passendi Pflanze, Schilf und Stuude dri und drumume pflanzt. I de Böim häd er Nischtchäschte ufghänkt.[2]

Störch[ändere | Quälltäxt bearbeite]

Als guete Vogelkänner häd de Adolf Bolliger au Beziige zu de Storchesidlig z Altreu gha.[2] Zäme mit em Walter Näf und em Heidi und em Hansjörg Katzbach häd er 1979 di erschte Störch vo Altreu uf Ötwiil pracht und da en Ussestation vo de Storchesidlig gründet.[3]

Referänze[ändere | Quälltäxt bearbeite]

  1. Zeitungsmeldung vom 7. August 2000.
  2. 2,0 2,1 2,2 ETH Life Print 8/2002, 23. August 2002, S. 12.
  3. Storch Schweiz, Bulletin 36/2007, S. 10.

Koordinate: 47° 15′ 42,1″ N, 8° 43′ 35,8″ O; CH1903: 697478 / 235331