Abstrakti Moolerei

Us der alemannische Wikipedia, der freie Dialäkt-Enzyklopedy
Robert Delaunay: Disque simultané, 1912/13

Abstrakti Moolerei (von lat. abstrahere: abzie, drenne) oder au Absoluti Moolerei isch e Sammelbegriff für verschiideni Ströömige in dr Klassische Modärne, wo d Moolwiis nid geegenstandbezooge isch.

As Abstrakti Moolerei luegt mä s Ordne oder Komponiere mit Farbe, Kontrast, Linie und geometrische Forme aa ooni absichtligi Abbildig vo Geegeständ.

Die Abstrakti Moolerei het mit äim vo de Grundbrinzipie vo dr oobeländische Moolerei broche. Bis zum Aafang vom 20. Joorhundert het sich s künstlerische Schaffe uf real existierendi Objekt bezooge und das isch allgemäin gültig gsi und unabhängig vo dr Schdiilrichdig.

In dr erste Helfti vom 20. Joorhundert isch dr Begriff vo dr Abstrakzioon in Bezug uf die Bildendi Kunst immer wiiter brucht worde. Mit Abstrakter Moolerei het mä schliesslig jedi beliebigi Form von ere veräifachende Daarstellig chönne bezäichne, wo d Iidrück vo dr Natur reduziert.

D Ursprüng vo dr Abstrakte Moolerei um 1910[ändere | Quälltäxt bearbeite]

Kasimir Malewitsch: Schwarzes Kwadraat, 1915

Dr Wääg in die räini Abstrakzioon wird in dr Kunstrezensioon as e notwändigi Entwicklig innerhalb vo de allgemäine Tendänz in dr Klassische Modärne aagluegt. So wird die Abstrakti Moolerei as e Konsekwänz vom Neoimpressionismus, Foowismus, Expressionismus und Kubismus ufgfasst.

D Aafäng vo dr räin abstrakte Moolerei lige in dr Zit noch 1910. Zu de maassgääblige Gründer zelt mä dr Wassily Kandinsky (1866–1944), dr Frantisek Kupka (1871-1957), dr Piet Mondrian (1872-1944) und dr Robert Delaunay (1885–1941). Äins vo de radikalste und kontrovärsiste Wärk vo dr Abstrakte Moolerei is s berüemte Schwarze Kwadraat vom Kasimir Malewitsch, wo im Joor 1915 yum erste Mol usgstellt worde isch.

In dr Zit, wo die Abstrakti Moolerei entstande isch, het s käi bestimmti Grubbierig vo Künstler gee, wo sich nume dere nöije Richdig in dr Moolerei verschriibe häi. D Mooler, wo nid geegestandsbezooge gschafft häi, häi zu verschiidene, meer oder weeniger unabhängig wirkende Ströömige ghöört.

Die nöiji moolerischi Sichtwiis het sich noch 1910 schnäll in Europa verbräitet. Im Joor 1913 cha mä scho von ere „Moode“ reede. Hüte isch die Abstrakti Moolerei en integraale Bestanddäil vo dr Kunst vo dr Modäne.

Weblingg[ändere | Quälltäxt bearbeite]

Dä Artikel basiert uff ere fräie Übersetzig vu dere Version vum Artikel „Abstrakte_Malerei“ vu de dütsche Wikipedia. E Liste vu de Autore un Versione isch do z finde.